Санаи 17-уми августи соли равон дар Қасри фарҳанги шаҳр чорабинии сиёсиву фарҳангӣ бахшида ба Рӯзи касбии кормандони соҳаи тиб ташкил ва гузаронида шуд, ки дар он раиси шаҳр Худойназар Амонзода иштирок намуда, кормандони соҳаи тандурустии шаҳрро ба рӯзи касбиашон табрик гуфт. Дар табрикоти хеш Худойназар Амонзода қайд кард, ки имрӯзҳо хушбахтона барои табибон тамоми шароитҳои муассир муҳайёст ва хидматрасонӣ ба мардум дар сатҳи талаботӣ қарор дорад. Танҳо ба табибон дасту дилу нияти нек метавонад роҳ ба сӯи обрӯи воло кушояд ва боиси хушнудист, ки дар соҳаи тандурустии шаҳрамон ҳастанд нафароне, ки ба саломатии мардум солиёни тулонӣ дасти кумак дароз кардаанд. Пайваста қабул ва амалӣ шудани барномаву стратегияҳо ва санадҳои нави меъёрии ҳуқуқӣ вобаста ба соҳаи тандурустӣ аз таваҷҷӯҳи ҳамарӯзаи роҳбарияти кишвар, Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон шаҳодат медиҳад.

Баъди табрик аз ҷониби раиси шаҳр ба якчанд кормандони фаъоли соҳаи тандурустӣ Сипоснома ва тӯҳфаҳои хотиравӣ тақдим карда шуд.

Ҳамзамон барномаи консертӣ пешкаши иштирокчиёни чорабинӣ гардонида шуд.

Дар охир менеҷери КАТС Ғоибов В.Т. миннатдории аҳли кормандони соҳаи тандурустии шаҳрро барои дастгириҳои ҳамаҷонибаи Сарвари давлат, Пешвои миллат Эмомалӣ Раҳмон ба соҳаи тандурустӣ баён намуда таъкид кард, ки дар оянда низ табибон баҳри сиҳатии омма аз тамоми имконот истифода хоҳанд бурд.

Мухбири “НИ”