Омӯзгорони арҷманд!

Шуморо ба рӯзи касбиатон таҳният намуда, бароятон тани сиҳат, хотири ҷамъ ва тамоми хӯшиҳои зиндагиро таманно дорам.

Чуноне ки Шумо огаҳ ҳастед дар ҳама давру замон муаллим чун шахсияти баркамоли ҷомеа шинохта шуда, эҳтироми ӯ дар дили мардум чун як нафари намунаи ибрат боқӣ мондааст.

Дар кишварамон Тоҷикистони азиз ба омӯзгорон ва умуман ба соҳаи маориф аҳамияти махсус дода шуда, ҳамасола таваҷҷӯҳ барои беҳтар гардонидани шароити таълими омӯзгорон зоҳир карда мешавад.

Дар шаҳри Истиқлол низ соли равон аз буҷаи маҳаллӣ бо харҷи зиёда аз 200 ҳазор сомонӣ ҷиҳати беҳтар намудани раванди таълиму тарбия маблағҳо ҷудо гардидааст. Ва ин иқдом оянда низ идома хоҳад ёфт.

Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон дар суханрониашон бахшида ба омӯзгорон чунин қайд намудаанд: “ Омӯзгор дар меҳвари соҳаи маориф қарор дорад. Сатҳу сифати дониши шогирдон ва тарбияи шоистаи онҳо маҳз ба дониш ва маҳорати касбии омӯзгор вобаста аст” . Ба ҳамин хотир қайд кардан ба маврид аст, ки дар шароити кунунӣ омӯзгоронро зарур аст, ки ба таълиму тарбияи хонандагон аҳамияти ҷиддӣ диҳанд ва бахусус барои тарбияи маънавӣ, ватандӯстӣ, инсондӯстӣ, меҳнатдӯстӣ ва донишандӯзии онон аз тамоми имконот истифода намоянд. Бояд муаллимон дар рӯҳияи шогирдон эҳтиром ва арҷгузорӣ нисбати муқаддасоти миллию давлатиро тарбия намоянд.

Дар навбати худ соли равон заҳмати омӯзгорон буд, ки хонандагони муассисаҳои таълимии шаҳр дар олимпиадаҳои ҷумҳуриявӣ ва байналмилалӣ иштирок варзида, сазовори ҷойҳои намоён гардиданд. Лекин ба ин қаноат накарда, омӯзгоронро зарур аст, ки барои боз ҳам бештар ҷойҳои намоёнро ишғол кардани шогирдонашон дар олимпиадаҳо кӯшиш беш аз ҳарвақта диҳанд.

Тавре бояд омӯзгорони муҳтарам, фаъолият намоянд, ки хонандагон дар зиндагӣ роҳи дурусту ростро интихоб намоянд ва тафаккуру андешаи солим дошта бошанд.

Мақомоти иҷроияи ҳокимияти давлатии шаҳри Истиқлол барои дастгирии соҳаи маориф ва омӯзгорон ҳамеша омодааст ва махсусан ба омӯзгорони болаёқат ва ботаҷриба, ки шогирдони донишманду бомаърифатро тарбия намудаанд мароқ зоҳир менамояд.

Бори дигар кулли омӯзгоронро ба рӯзи касбиашон табрику муборакбод намуда, бароятшон умри дарози бобаракат дар фаъолияти пурмаҳсул бурдбориҳоро таманно дорам.

Иди касбӣ муборак, омӯзгорони азиз!