Боиси ифтихору сарбаландист, ки Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон дар сиёсати хирадмандонаи хеш дасти некӣ дароз кардан ва таваҷҷуҳ ба наврасони ятиму бепарасторро дар ҷойи махсус қарор додаанд ва ин амали ғамхоронаи ин фарзанди фарзонаи халқу миллат нишона аз инсондӯстии эшон аст.

Чуноне ки аз сарчашмаҳои таърихӣ ҳам медонем, нафароне ки саховатпеша буданд ва дасти хайру сахо ба насли инсон дароз мекарданд назди мардум соҳибэҳтиром буданд, зеро бо иҷрои чунин амалҳои нек эътимод ба нафари саховатпеша зиёдтар мегардид ва мардум ин амали некро ҳеҷгоҳ фаромӯш намекард ва имрӯз низ фаромӯш намекунад. Бузургон низ фармудаанд, ки некӣ ҷовидона дар ҷойгоҳи ботинии инсон боқӣ мемонад.

Бо мақсади дастгирӣ ва кӯмак ба нафарони ятим ва бахшида ба Рӯзи пойтахт санаи 20-уми апрели соли равон дар шаҳр силсилачорабиниҳои иҷтимоӣ ташкил ва гузаронида шуд. Чун ҳарвақта дар Маркази саломатӣ ин нафаронро аз муоинаи тиббӣ ройгон гузаронида, бобати вазъи саломатии эшон табибон дар як вақт ба онон дастурҳо ва маводҳоро, ки барои пешгирӣ намудани бемориҳои сироятӣ пешбинӣ гардидаанд тақдим намуданд.

Сипас масъулини бахши кор бо ҷавонон ва варзиш ва комиссия оид ба ҳифзи ҳуқуқи кӯдаки назди МИҲД-и шаҳр ононро барои тамошои Осорхона, ки дар бинои Қасри фарҳанги шаҳр ҷойгир аст бурда, ба мероси таърихии шаҳр аз наздик шинос намуданд.

Санаи 18-уми апрели соли равон дар толори мақомоти иҷроияи ҳокимияти давлатии шаҳр бо иштироки намояндаи Раёсати Кумитаи ҳифзи муҳити зист дар вилояти Суғд Саидов Х.М. вохӯрӣ оид ба иҷрои қарори Раиси вилояти Суғд аз 25.05.2015, № 263 “Дар бораи татбиқи “Барномаи давлатии комплексии рушди тарбия ва маърифати экологии аҳолии вилояти Суғд дар давраи то соли 2020” баргузор гардид, ки дар он мудирони шуъбаю бахшҳои мақомоти иҷроияи ҳокимияти давлатии шаҳр ва сохторҳои он, роҳбарони ташкилоту муассисаҳо, раисони кумитаи маҳаллаҳо, хонандагон ва донишҷӯёни муассисаҳои таълимӣ иштирок намуданд.

Сухани ифтитоҳиро муовини якуми Раиси шаҳр Шарифзода А.А. оғоз бахшида, ҳозиринро бо намояндаи Раёсати Кумитаи ҳифзи муҳити зист дар вилояти Суғд Саидов Х.М. шинос намуд. Инчунин ӯ оиди мақсади асосии вохӯрӣ ибрози ақида намуда, риштаи суханро ба Саидов Х.М. дод.